رئيس يمثلني

لمرة واحدة فقط شعرت وبكل فخر أن الدكتور مرسي رئيس يمثلني
كان ذلك يوم أرسل قنديل إلي غزة 
يوم أعلن رفض سلطة مصر الواضح لقذف غزة ومحاولة الصهاينة اجتياحها
يوم أضطرت إسرائيل لوقف القصف ولذلك بكاه من أدرك ذلك الموقف من الفلسطينيين 
ولذلك _غالبا _ دفع ثمن الموقف أغلي مما ظن 
وما أبعد حاضرنا عن ماضينا القريب 
اليوم نري مصريين يغنون لنتنياهو تسلم الأيادي لأنه حسب خيالهم العقيم "يربي حماس"
اليوم نري مذيعة شهيرة تطالب بإغلاق المعبر مدعية أن علينا حماية مصر من "الإرهاب" وكأن من يدخل يدخل :وكالة من غير بواب بلا تفتيش 
او أن الجرحي والشيوخ والنساء وأطفال فلسطين الفارين من قصف المنازل "إرهاب"
أو أن مريضا مشرف سيدخل حاملا أحد صواريخ القسام معه!!!
الأنكي أن المعبر أساسا مغلق فمن تطالبين بماذا سيدتي؟؟
اليوم نري بيانا حكوميا مائعا يدعو إلي وقف الإعتداء "من الجانبين" في مساواة مستفزة بين الجاني والضحية!!
اليوم تقذف إسرائيل غزة جوا ويعلن تصريح مصري عن تدمير الأنفاق ومع استمرار غلق المعبر فالسماء حمم والأرض تدفعك نحو حتفك!!
لك الله فلسطين فالبعض يحب أن ينسي ما فعلت إسرائيل علي مر عقود التاريخ
لك الله فنغمة التعايش والسلام التي تحمل كل الانبطاح والاستسلام هي التي يتغني بها العرب
لك الله فجيوش من يملكون الأسلحة موجهة إلي صدور ابنائك مع جيوش أعدائنا وأعدائك
وكفي بالله وكيلا 

البورصة في ملخصات 2 : صعود وهبوط

البورصة طالعة أجدع الرخاء هيعم البلاد.
البورصة نازلة أجدع هيتخرب بيتنا.
ولا بتطلع فيعم الرخاء ولا بتنزل فتخرب الدنيا
هيه اصلا طالعة نازلة بحكم طبيعة الأمور
 ازاي ؟؟؟
المنطق بيقول ايه ان فيه قيمة اسمية للشركة اللي هيه قيمة رأس المال :السائل ، المنشآت،،، الي آخره
وقيمة فعلية بناءا علي نشاطها وارباحها ومشاريعها وافاق مستقبلها
 يعني ممكن شركة تتقيم في اول طرح بمائة مليون ولأنها لا بتحقق ارباح ولا تساوي اسمها تنزل ف السوق وبالتالي ينزل السهم بتاعها.
ولو البورصة فعلا قائمة علي ما سبق تبقي مقياس دقيق جدا للنشاط الاقتصادي ،،الحقيقة بقي ان ذلك ليس كذلك
سعر السهم بيتحرك لفوق بناءا علي حركة الشرا الفعلي أو الوهمي :)
وعلشان محدش يتلخبط خلينا في فكرة الصعود والنزول نفسها
الأسهم لها حدود سعرية عادة بتتحرك فيها وتحقيق طفرات كبيرة أو انتكاسات فظيعة صعودا وهبوطا معتمدة علي العرض والطلب ببساطة
اما يكون فيه مليون سهم معروضين للبيع ومطلوب شراء مائة الف بس طبيعي سعر
 السهم هينزل
والعكس صحيح
زيادة الطلب وقلة المعروض وميل مالك السهم للاحتفاظ بأسهمه تخلي السعر يزيد
طب امتي هيزيد العرض ويؤدي لنزول السعر اما مالك السهم يكون شايف انه مش بيجيب ما توقعه يعني مثلا الشركة أعلنت عن خسائر أو دخلت ف مشروع واضح انه وحش أو مثلا فيه تغيير ف مجلس الادارة حد كويس مشي واللي جاي مش معروف أو متعودة توزع كوبون أرباح سنوية قررت حجب التوزيع عشان مفيش ارباح ..يعني أي حاجة تندرج تحت مسمي :أخبار سلبية
والعكس أيضا صحيح : أخبار ايجابية علي سهم ما يرفع السعر.
وضع البلد واستقراره السياسي يؤثر سلبا وايجابا علي الاستثمار. 
سياسات الاستثمار التي ينتهجها نظام سياسي ممكن تطلع او تنزل قيمة شركات البلد أو حتي تقفل البورصة خالص!
ده كله كلام في مثاليات الموقف عشان اما نفهم الاساس ممكن نستوعب أكتر التلاعب والتهجيص اللي بيحصل ف السوق.
وإلي اللقاء في ملخص جديد ويا ريت يكون الكلام واضح واذا ما كانش اسألوني ولو معرفتش اجاوب هاسأل وارد عليكم :)
لو حد عنده اضافة او اعتراض علي معلومة نرحب بأي معلومة أو حتي ساندوتش وكله للمصلحة العامة :)

صورة وصورة

أتذكرون صورة ميدان التحرير في يناير 2011
أتذكرون يوتوبيا الشباب الطاهر المبتسم المستعد للتضحية بكل شيء من أجل غد أفضل للوطن الصورة السلمية المتحضرة الحالمة المصرة علي ازالة الديكتاتور وتحقيق حلم العيش والحرية والعدالة الاجتماعية للجميع.
  أتذكرون مينا دانيال ومحمد  وهنعدمهم هنا هوه هنا هوه
صورة حضارية جميلة تصدرت كل الصحف وتناقلتها وكالات الانباء.
 وكنا فخورين بانتمائنا لبلد انتفض من سباته واجبر ديكتاتور علي الرحيل ،،او هكذا تصورنا
رأينا مصريين يعيشون في بلدان أوروبية ويضعون علم مصر علي صفحاتهم ويتفاخرون بانتمائهم لهذا الشعب العظيم :)
كانت مصر كما نحب أن نراها كما حلمنا بها،،كام يوم وتغيرت الصورة وافقنا من الحلم.....

والآن نري صورة أخري مقوماتها ناس غريبة بتقول ان الشعب ده ما ينفعش يتحكم غير بالكرباج وتدلل بالفوضي الضاربة في كل شيء وكأن من يتهم "الشعب ده" من السويد او كندا وكأن هناك شعوبا يصلحها العدل وأخري يصلحها الظلم !!!
والصورة السلبية متعددة المكونات بما لا يتسع لها مجرد تدوينة ولكنني هنا أركز علي جزء صغير منها.

جزء لافت جدا في الصورة بالنسبة لي ظاهرة النساء الراقصات في العرس الديموقراطي !!!

تسمية استفتاء او انتخابات "عرس ديموقراطي" يبدو انها السبب في معاناة مثلي من مظهر يصلح للتدليل علي فساد الذوق واساءة الفهم وغباء التصرف بامتياز.
مش مشكلتي ان ام سوسو فرحانة انها بتتصور في التليفزيون ومن ثم لازم تخبطلها زغروطة وتهز شوية علي انغام تسلم الايادي.
الحقيقة البسيطة انني اشعر بالعار ليس فقط لأن لا سوسو ولا امها عندهم دم يجعلهم يحترمون دماء جيران واقارب ومعارف سالت في الشارع لأن لهم رأيا مختلف ولكن أيضا لأن صورة الراقصات في طابور انتخابات صورة تدل علي فساد الذوق وفقدان التمييز.
من يذهب الي الشاطيء لا يمكن ان يذهب بسواريه ومن يذهب الي الاوبرا لن يدخل اذا كان يرتدي بيجامة.
اذا تحدثت لسيدة فلا يصح ان ترفع صوتك او تتلفظ بما لا يليق دي أوليات تعامل مش هينفع فيها تخترع أو تقول بإنك بتعلم العالم الحضارة الحقيقية علي واحدة ونص !!

صورة "الشعب العبيط" عذرا الذي يتمني الحكم بالكرباج ويعامل الانتخابات _وهي شيء جاد_ معاملة عيد ميلاد او حفلة  حنه صورة مخجلة حتي النخاع.
وأخيراً  ده مش فرح بنت العمدة عشان تجامليهم بزغروطة ورقصة يا مودام!!!

خليني احبك

مش سياسة عادي يعني أغنية عملتلي عصف ذهني علي الصبح
اغنية قديمة للغاية بتقول مليش امل في الدنيا دي غير اني اشوفك متهني لا يا شييييخة يعني يعرف عليكي نصف ستات الكون عادي طب حضرتك متأكدة انه حب يعني ولا حد قالك ده مريض وايامه معدودة وهنمشيها صعبانيات
يعني ايه امل حضرتك تشوفيه متهني واذا بعده عنك يسعده يبقي يبعد لا والله
شوفي يا مودام هيه واحدة من اتنين يا هو حد يهمك يبقي لو بعده عنك يسعده يبقي بالسلامة ولا ف داهية وخلاص او هو حد معرفة مثلا او وجوده زي عدمه ف حياتك يبقي برضه سعادته ببعده عنك مش اولوية لحضرتك
 ومكملة بقي اما انا مهما جري هافضل اصون عهد الهوا ،،هوا اما يطرشق ضلوعك يا شيخة !!! عهد من جانب واحد ازاي يعني بتعاهدي نفسك؟؟؟ ويا تري العهد هتصونيه لنفسك برضه يعني مش هتخونيكي؟؟؟ أصله هو خلاص نفض وكبر وبقي سعادته ف البعد عنك يبقي صيانة العهد دي بقي ايه من قبيل جمع الانتيكات؟؟؟؟
وامعانا في غيظي واثارة حفيظتي الاقيها بتقول ان جيت ف يوم وما حبتنيش اكدب عليه وما تقوليش ،،الواحد يقولها ايه دي!!!! بشويش كده واحد لقي سعادته ف البعد عايزاه ما يقولش ايه يعني يجيب لك ورقة طلاقك ف هدية ملفوفة بشريط احمر ومعاها خطاب شكر ،،هتفرق يعني لو بلغك انه خلاص نفض بمنتهي الحنان ،،ايه العذاب ده!!!

 يا ستي اللي ميحسش بقيمتك ويسعده بعدك ما تفكريش فيه مرتين علي الاقل عشان تسيبيله فرصة للسعادة التي ينشدها بعيد عنك :)) مش ده برضه كل املك ف الدنيا
ملحوظة : تدوينة غير موجهة مجرد خواطر ناتجة عن أغنية واي تشابه بينها وبين الواقع هو محض صدفة :)) 

المقموصة

http://www.youtube.com/watch?v=ifs9zevgxHU
ندوة فيها مذيعة غريبة الأطوار بجد كانت مقموصة وبتستنكر هو ده السؤال هو ده السؤال اللي عطيتهولي :)
اصل الطالب فاجأها والمودام مش بتعرف تتعامل كده مع حد أخدها علي خوانة :)
نيجي بقي لرباطة جأش الفريق مميش
ابتسم وقرر انه يحرج الطلبة دول بقي كلهم طب قال ايه؟؟
الطالب بيقوله هل الجيش شغله انه يقتل الناس ؟؟
فحدثه عن مهمة استراتيجية صحيح انا مش خابور استراتيجي لكن تفنيدها مش محتاج خوابير 
في حالة وجود تهديد خارجي أو داخلي يهدد "كيان الدولة" يتدخل الجيش ،، صلاة النبي 
يعني اي حاجة بتهدد النظام اللي هو نظام مبارك تحديدا علي فكرة لأن تهديد رئيس منتخب وعزله لم يكن تهديدا ل "كيان الدولة" ولا حتي ركن مبارك في 2011 علي جنب لحد ما يفرجها ربنا
بل ان الجيش ساعتها استحدث لنفسه مهمة استراتيجية لطيفة للغاية اللي هيه ايه بقي : الانحياز للشعب طبعا ،، ما دام مطالبه علي هوايا :) فكرة برضه
 سيادة الفريق هو يطلع ايه "كيان الدولة" ؟؟ والله بأسأل بجد
هل هو كيان الحكام المنتمين للمؤسسة العسكرية؟؟ 
هل هي مصالح المؤسسة العسكرية؟؟
ما هي دولة رايحة ف داهية وكيانها ملوش اي تلاتين لزمة الدولة اللي يهددها هتاف وبالونة ،، صح؟؟؟

تخاريف اقتصادية

حلقة الاستاذ حسن هيكل مع شريف عامر كانت متميزة وأثارت لدي  تساؤلات
مثلا لماذا الاصرار علي عدم  تحديد حد أقصي؟؟ 
اذا كان الخبير العبقري سيهرب اذا لم احاسبه بالسعر العالمي أين تكمن تلك الخبرة معدومة التقدير لما نعيشه وما نعانيه؟؟
 وحتي اذا كان عددهم محدود ولن اوفر الكثير اذا حجمت مكاسبهم وليست المسألة بالتأكيد "حقد" علي ناجح بل هي ببساطة تقوية للنسيج حتي لا يكون مصدرا لحقد الآخرين  
لماذا اري ان الحد الاقصي مهم؟
حسنا ركزت في حديثك علي اشارات ورسائل القرارات
اذا حاسبت الخبير الاقتصادي بسعره العالمي وحاسبت ساعي مكتبه بسعر مختلف فهنا تكمن رسالة سلبية تصل الي الساعي الذي لا يحاسب بما يعادل "عمله" عالميا وليس عمل الخبير طبعا
اين العدل اذا كان الاصرار علي ان يعيش معظم الشعب في مصر "الغلبانة" التي تقدر مجهودهم بالجنيه المصري وتطالبهم بالتحمل
ويعيش الآخرون في عالم موازي يقدر مجهوداتهم باليورو والاسعار العالمية؟؟؟
اليست رسالة سيئة للغاية؟

 ولماذا بيع ما تبقي من القطاع العام للبنك المركزي حزمة واحدة ،هل هو ضمان
ضد الفساد؟ كما يبدو ضمانا ضد الفشل الإداري؟؟ 

 ماذا عن الفساد؟؟؟؟
وهو نزيف دائم لمصادر الدولة ونهب لما تبقي من ثروتها ان كان بقي لها شيء :(
ماذا عن تقنين الفساد وهو ما يحمي اللص تحت حزمة قوانين سنتها العصابة
وماذا عن عدم كفاءة الأجهزة الرقابية وتواطؤها في بعض الأحيان؟؟؟ وقوانينها ايضا التي تثير الدهشة فمن يبلغ عن فساد عليه أن يأتي بمستندات لإثبات أقواله وكأنه يتعين عليك عند الإبلاغ عن جريمة ألا تكتفي بالابلاغ عن الجريمة بل أن تأتي بالأدلة ويا حبذا لو جبتلهم الفاعل متكلبش :)

الا تعلم _حقيقة_السر وراء تضاعف الدين؟؟؟
لست خبيرا امنيا ولكنني اعلم يقينا ان حرب الشوارع في مصر حتي الآن فاتورتها ليست كبيرة
وكذلك الزيادة التي حصل عليها العاملين بالدولة رغم استمرار  "الكبير كبير" واصحاب العزبة بكل امتيازاتهم  بلا اي محاولات حقيقية لتحجيم ما يحصلون عليه خصوصا ان "كله بالقانون"
 تأثراقتصاد الدولة بضعف القادمين  للسياحة وقلق المستثمرين _كلها عوامل
يبقي عامل آخر لم يتطرق لمناقشته أحد : تهريب الأموال والتقاعس في استرداد ما ثبت وجوده بالخارج
ألست معي يا سيدي انه عامل وعامل مهم للغاية
كل من يتعامل مع الدولة علي اساس "النهيبة" من الممكن أن يبقي كل او جزء مما  ينتهب اذا كان مطمئنا ان "البلد بلدنا"
هذا يتغير حتما الي "إلحق طلع الفلوس بره" عند الاحساس بالخطر وايضا لم يعد النهب "بالراحة" فلا احد يطمئن الآن لاستمرار تدفق المنهوبات

لا يكفي ان تقتطع منهم ضرائب اكثر بل يجب ان يعمل الجميع في بلد واحد :))
أخيرا ادينا بنحاول نفكر رغم يقيننا جميعا بأنه لا حياة لمن تنادي ،،،،غالبا :))

تخاريف الأرق

فيلم علي يوتيوب أغاظ أردوغان لدرجة أمره بحظر يوتيوب في تركيا لم؟؟
لأنهم أذاعوا ما يمكن إعتباره وثيقة أمن قومي 
هل كانت ملفقة ،،لا أظن
كانوا يتحدثون عن طرح فكرة لو أضطررنا فسنبعث إلي سورية من يضرب تركيا ثم نتدخل بدعوي الدفاع عن أمن تركيا 
هل هذا الطرح "غريبا" علي ما يسمونه شغل المخابرات ؟؟ الحقيقة لأ خالص 
هل هذا الطرح يستقيم مع المباديء الإنسانية ؟؟ برضه لأ خالص :)
طرح لا أخلاقي ولكنه ليس مضادا لما يمكن أن تفعله المخابرات - أية مخابرات.
قالوا إن أمريكا ضربت برجيها بنفسها لكي تجد المبرر لضرب العراق والإستيلاء علي بترول الخليج "باكيج"
ربما هذا حدث المؤكد إن أمريكا إدعت وجود أسلحة لم تكشف عنها أي حملات تفتيش في العراق .
ما يحدث في ليبيا للمصريين موضع علامات استفهام تكرره في بنغازي الأقرب للحدود المصرية يجعل قصة "شغل المخابرات " وارد ، الضحايا من مسيحيي مصر اللي طول عمرهم بيروحوا ليبيا يشتغلوا بلا أدني مشكلة إيه الجديد؟؟ 
تركيز الضحايا في الأقباط المسيحيين تحديدا لأنهم الطرف "الأضعف" الذي يضغط علي أعصاب المجتمع وأنا أوله :)) دائما الأقلية موضع تعاطف وأيضا موضع "حماية" دولية طب ليه اللفة دي كلها ؟؟؟
أليس بترول ليبيا هو البترول العربي الوحيد خارج  السيطرة بقوات عسكرية أمريكية؟؟
مؤامرة لطيفة : شخصية مثل أوميجا تشبه الي حد ما شخصية صدام يدعمونه سرا ويرفضونه جهرا تماما كصدام
إذا تم تصوير بترول ليبيا كأنه الحل الأمثل لمشاكل الإقتصاد المصري المزمنة وليبيا الآن لن تستطيع مواجهة الجيش المصري 
سيصورون القصة علي إنها خطوة أخري في حرب الإرهاب لأن ليبيا يوجد بها جماعات مسلحة تنتمي للإسلاميين
ثم يتدخل الغرب حامي الحريات لمنع إعتداء "الديكتاتور الأرعن" علي بلد مجاورة وطبعا هتفضل الجيوش الغربية مدة مناسبة عشان تحمي "ليبيا" شفتوا حلوة ازاي :))
أنا باقول أكمل نوم أحسن :))

البورصة في ملخصات

صباح الفل النهارده الجمعة (مفاجأة صح؟؟)
طيب خلاص خلاص هادخل في الموضوع لي سنوات من أول قيام الثورة وأنا أري أخبار خسارة ومكاسب المليارات في البورصة وبصراحة مش بتفرق معايا لأني أعلم جيداً معني كلمة خسارة ورقية. 
يعني لو قالوا البورصة خسرت خمسة عشر مليار أمس والتعامل كله من أول الجلسة لآخرها تم علي مليار ونصف نفهمها ازاي دي ؟؟
نضرب مثال جايز يقرب الفكرة في جيبك الف سهم اشتريتهم اليوم الواحد بسعر سبعة جنيه. 
ارتفع السعر غدا ليصبح سبعة وربع فقررت أن تبيع مائة سهم كسبت كام ؟؟ خمسة وعشرين جنيه ده مكسبك الفعلي وحجم التعامل كان سبعمائة خمسة وعشرين  اوكي؟؟ لو قلنا مكسبك الورقي كام هنحسب كأنك بعتهم كلهم بالسعر الحالي اللي هو سبعة وربع يعني يبقي مكسبك الورقي مائتين وخمسين واضح؟؟ 
لو انخفض السعر غداً الي سبعة جنيه وعشرة قروش هنحسبها ازاي؟؟ بنقارن بسعر أمس فنقول الخسارة الورقية مائة وخمسين جنيه بينما لو انت بعت مائة تانيين هتحقق ربح مقداره عشرة جنيهات فعليا لأنك اشتريت بسبعة وبتبيع بسبعة وعشرة قروش وكذلك القصة في التعامل في البورصة وحسابات الجلسة علي بعضها كده .
فيه مكاسب فعلية وخسارة فعلية بيحققها البيع والشراء، نقطة حساب السعر أصلا للسهم بتعتمد علي قيمته الإسمية فيه اسهم في البورصة قيمتها الإسمية عشرة جنيه مثلا انما التداول عليها بيكون في حدود خمسين جنيه وأسهم بخمسة ومش بتعدي جنيه ونص وهكذا 
ومكاسب وخسارة ورقية بافتراض انك بعت او اشتريت بسعر اليوم لو فهمتوا حاجة ابقوا قولولي ولو فيه سؤال يا ريت برضه تقولولي وإلي اللقاء في ملخص آخر :)

أية مصريين ؟؟

صرح المشير السيسي بأننا ماضون بكل قوة لبناء دولة ديموقراطية حديثة ترضي "جميع المصريين"
عقب يوم واحد من صدور حكم محكمة بالمنيا بإعدام 529 من هؤلاء "المصريين" وذلك لإرتكابهم جريمة قتل لنائب مأمور مطاي وشروعهم في قتل ضابط ومجند ،، طبعاً منتهي العدل الواحد من الداخلية يساوي علي الاقل خمسمائة أماااااال؟؟؟
ارتكبوا اعمال حرق وتخريب وسرقة سلاح يبقي إعدام طبعاًًً
المثير للدهشة ان معاهم 16 واحد أخدوا "براءة" يا مؤمن!!!! براااااءة؟؟؟ معاهم في نفس القضية ،، ايوة 
طب فرقوهم ازاي دول 545 بني آدم والقضية اتقفلت في جلستين والجلسة الأخيرة تحديدا كانت عشرين دقيقة ولم يسمح القاضي لمحامي إنه ينطق أصلا ،، يحيا العدل والله 
يمكن القاضي ممشيها فراسة مثلا؟؟؟
يمكن توسم فيهم البراءة فبرأهم :))
الخمسمائة تسع وعشرون كان باين عليهم معتادي إجرام بصراحة ده واحد منهم ،،

مجرم طبعا لا يغرك سنه ولا شكله ولا ذهوله وهو بيحضن اخته بعد ما سمع الحكم 
 بعضهم استشهد في فض رابعة بس مافيش مانع يتعدموا زيادة تأكيد ،هناك أيضا من كان سجينا وقت أحداث المنيا ،، ما تاخدش ف بالك الحاجات دي نسبية
إعدامات بالجملة علي سبيل الحق الاوكازيون تحطيم اسعار حصري الخمسمية بواحد واذا كان عاجبكم !!
دولة الديموقراطية الحديثة لا تعترف بالعدالة الانتقالية ويصرح وزير خصصوه للمهمة مرة بإنه : مش وقت عدالة انتقالية ، والمرة الأخري : بإنه ليس من عمله اجراء مصالحات بين فصائل سياسية مختلفة ..ايه الحلاوة دي ؟؟ طب سيادة الوزير إنتي جاية اشتغلي إيه؟؟
فعن أية مصريين تتحدث يا سيادة المشير؟؟

سي سي اشتغالات

لم أتخيل أن يكونوا بسذاجة إشتغالة علمية 
العلم مينفعش نشتغل بعض فيه إنما هم تخيلوا إن " أي حاجة ممكن تشتغل" 
اذا صنعت جهاز تشخيص -ومعرفتش تاخد عليه براءة اختراع -مينفعش انك تقول هنعالج باستخدام نفس النظرية اللي هيه انت اساسا ما ثبتهاش ف التشخيصِ!!
هنقول للناس سعادة اللواء لقي علاج للإيدز ، والسي ، وممكن يعالج الكانسر ؟؟ آآآه يعالج الكانسر ممكن يعالج الصدفية كمان ويرجع جلد المريض زي جلد بيبي حديث الولادة طبعاً ده مش كلامي ده كلام فريق (البحث العلمي) اللي شغال مع الدكتور اللواء اللي طلع مش دكتور ولا لواء وما تركزش معاهم عشان ما تتعبش:)
انه عصر التهييس بلا شك ، عصر الكذب "البجح" اللي حتي مش مكلفين خاطرهم يتعبوا فيه ويتعبوا ليه إذا كان وراهم ناس بتصدق أي كلام ؟؟؟
عصر فردة الصدر بتاعة سوف نذبح بلا بلا بلا  رجع تاني المشكلة ان العالم دلوقت قرية صغيرة بتهرتل انت ف القاهرة تلاقي واحد بيرد  من تورنتو يقولك لم الدور !!!!
اما تكون كذاب وابن ستين ومافيش عندك أي ميول لاحترام عقل حد احترم نفسك وهرتل في اللي تعرفه!!
علي الاقل لو هرتلت وقلت عملت صاروخ ولا غواصة مش هتلاقي غير ناس مرعوشة بتلاتين سيادتك يا افندم حضرتك يا افندم الموضوع مش كده 
انما هتهرتل علم هتلاقي مليون واحد يقولك ارحم نفسك وابعد عن السكة دي شغل الاراجوزات اللي بيطلعوا يقولوا عملت واكتشفت واخترعت ونتايجي مائة  بالمائة شفناه قبل كده انما بصراحة اراجوزات الكفتة وطبعة الجاكتة دول موديل جديد وعادي مش هنرحم حد ما دام مرحمش نفسه والإخوة  والأخوات اللي دافعوا وقالولنا مية وغطاس نصيحة اطلعوا من دماغي عشان كان فيه وخلص خلاص :)
http://www.almasryalyoum.com/news/details/399190 مقال استعباط بعد نشر فيديو لنقد علمي ..جتكم خيبة هتكشفوا عن الدي ان ايه بتاع ار ان ايه فيروس :))

أجندة

لأن أجندتي هي الوطن كانت الثورة حلم تشبثت به ورأيت فيه الخلاص

ولأن اجندتي هي الوطن أسكتت كل شكوكي حتي بدأت حقيقة العسكر تتجلي بما لا يقبل الشك فهتفت يسقط يسقط حكم العسكر.

ولأن اجندتي هي الوطن ساندت أول رئيس منتخب وتمنيت أن ينجح.

ولأن أجندتي هي الوطن تخليت عن تأييده بعد الإعلان الدستوري الذي حصن قراراته وربما لو فهمت أسبابه الحقيقية لبقيت علي موقفي المساند ولو إلي حين.

ولأن أجندتي هي الوطن اخترت حل انتخابات رئاسية مبكرة حقيقة لم أوقع تمرد ولكنني كنت مقتنعة جداً بالفكرة.

ولأن أجندتي هي الوطن لم انزل في تلاتين يونيو لكثرة وجوه النظام السابق ورموزه فيها مع ذلك أسميتها ثورة وتمنيت بداية أن تنجح في تصحيح المسار رغم توجسي الشخصي.

ولأن أجندتي هي الوطن كان لدي استعداد عميق لتصديق السيسي مبدئياً اذا اثبتت الأيام أنه جاء لإصلاح مصر وليس لحكمها وقمع كل من يجرؤ علي معارضته.

ولأن أجندتي هي الوطن اتمني من كل قلبي أن ينهار حلم العسكر وحكمهم في آن واحد.

جاء بكلام عاطفي ليسيطر علي مشاعر جماهير طيبة "تريد أن تصدقه" والسياسة ليست كلمتين وخلصت ولم يستطع أن يتخفي طويلاً في ثياب المصلحين لمن "يريد أن يراه"

ولأن أجندتي هي الوطن قررت أن أحلل مواقف من يزعمون العمل له وليس مشاعري تجاههم

ليبق الوطن دائماً فوق الجميع وأولهم أنا :)

إرادة شعبية

الشعب يريد

مظاهرات وقمع سلطة وقتلي

اعتصام ورصاص ونار وقتلي

وجاء تقرير منظمة العفو الدولية بأن السلطة المصرية تستخدم القوة بصورة مفرطة في التعامل مع المحتجين

بعدد قتلي الف واربعمائة في تقديرهم منذ يوليو

كان علي الخارجية المصرية أن ترد ..ان تدحض الاتهامات ..أن تسوق أدلة دامغة

تؤكد بها إن هذه افتراءات بعيدة كل البعد عن واقعنا المصري

ولكنها لم تفعل عظيم اختارت ان تصمت اذن أو ان تتعهد بمعالجة الاحتجاجات بصورة 

أفضل مستقبلاً....ليتها فعلت

لقد اختارت الخارجية المصرية أن تدفع الاتهام بأغرب دفع دبلوماسي علي الأرض 

قالت ان تقرير منظمة العفو الدولية لا يحترم الارادة المصرية !!!

العفو الدولية تتبع ثوابت أخلاقية ومهنية من المؤكد ان ليس من ضمنها "الإرادة الشعبية"

تعالوا نبسطها لو إنك لاحظت جارتك تلقي بطفلها من النافذة فأبلغت البوليس ودفعت 

التهمة أثناء التحقيق بأنها ارادة عائلية وليس لأحد أن يتدخل بها بالله عليك ماذا سيكون موقفك؟؟؟

بلاش دي لو أشعلت حريقاً في بيتك وقلت انك قررت بإرادتك الحرة ان هذا هو اكثر

طريق ملائم للتدفئة ماذا سيكون رد فعل المحيطين بك؟؟؟

قول يا راجل متتكسفش بالظبط كده مجنون

طبعاً مجنون وده كلام هبل اصلا ً

لم؟

لأن الحرائق ليست الوسيلة المثلي للتدفئة بإجماع العقلاء

مال منظمة العفو الدولية بشئوننا الداخلية ؟؟؟

مالك ومال ابن الجيران اللي مامته حدفته من البلكونة؟؟؟

ثم اجعلهم يشعرون أن أمنهم مهدد

أذكر انفجار كارثة انفلونزا الطيور

اذكر عناوين الاخبار والمتابعة والرعب

اذكر ان الديك الرومي وصل سعره الي خمسة وعشرون جنيها مصريا فقط ومع ذلك لم يجد من يخاطر بشرائه

اذكر مزارع صغيرة افلست ومزارعين ماتوا كمدا

واذكر ايضا التاميفلو الدواء المعجزة الذي بلغ سعره خمسمائة جنيه وربما تعداها ومع ذلك لم يتوقف الناس عن سعار تعاطيه خشية اصابتهم بوهم

أذكر أحد اقاربي المهندس الزراعي الشاب الذي كان يعمل وقتها بأحدي أكبر شركات الدواجن عاد من العمل حانقاً لأنهم يعدمون الدواجن السليمة لسبب إقتصادي بحت "تدني السعر بالسوق"

ثم تلتها إنفلونزا الخنازير وخشيت أن تتبعها في عام لاحق إنفلونزا صراصير أو سلاحف

لا أعلم يقينا ما يدفعهم لإثارة الهلع مؤكد أنه لغرض ما فها هي شائعات المرض العضال الوبائي اللوذعي المتحور تضرب من جديد 

لماذا لم تظهر "أوبئة" في ثلاثة سنوات سابقة كان فيها الكثير من التجمعات بالملايين؟؟

أعلم أن المرء عدو ما يجهل وأن الخوف مدخل مضمون للسيطرة علي الخائفين ..تقنية أمنية ...ربما 

لندع قصة المؤامرات جانبا لنتحدث عن حقائق علمية 

أولا : انفلونزا الخنازير تم ادراجه تحت الانفلونزا الموسمية من عام 2010 ما الجديد الآن؟؟

ثانياً : وفيات الأطباء الأول ب marsa نوع من البكتيريا المقاوم للمضادات الحيوية ، آخر ب E-coli بكتيريا أخري ، ثالثة ب جلطة رئوية ..أي لا يوجد أي مبرر لاعتبار أن الاطباء المتوفين نتيجة لإصابتهم بالفيروس فلم يثبت حالة وفاة واحدة بين الأطباء نتيجة للفيروس.

انفلونزا الخنازير كأية انفلونزا  اذا ما تعرض لها كبار السن أو مصاب بضعف المناعة فإحتمال المضاعفات والوفاة أيضاً وارد 

إنفلونزا الخنازير ليست طاعوناً ولا كوليرا القرن الواحد والعشرين 

إعقلوا يرحمكم الله 

انفلونزا...............يا مامي

محاصرين بوسائل اعلام لا ترحم ما صدقت لقت حاجة تتكلم فيها ليل نهار ما لهومش سيرة غير انفلونزا الخنارير الحمد لله الذي عافانا مما ابتلي به غيرنا وفضلنا علي كثير من خلقه تفضيلا وسبحان الله من يوم ما بدأت الانفلونزا تتجه للطيور والحيوانات وايامنا جميلة ولسه!
الكلمة المستفزة جدا واللي بدأت تنتشر كالنار في الهشيم يقولها كل من هب ودب (الموقف الآن تحت السيطرة ولكن الخوف من اتحاد الفيروسات!!!!!!!!!!!!!!!) قصدهم يعني الاتحاد بالاحماض النووية بين فيروس انفلونزا الطيور وانفلونزا الخنازير وقبل كده كانوا يتحدثون عن تطور فيروس انفلونزا الطيور فينتقل من بني آدم الي بني آدم للاسف الفيرس لحد دلوقت اثبت انه ابن ناس وما عملهاش ههههه
تطورات او طفرات الفيروسات شيء معروف علميا بالتأكيد ولكن من الثوابت العلمية ايضا انه لا يمكن التنبؤ بالطفرة قبل حدوثها يعني الطفرة ممكن تحصل فعلا فينتج عنها فيروس غير مرضي من اصله فلا يصيب اي حد باي حاجة وممكن تحصل فينتج عنها فيروس لا يتلاءم مع الحياة فيموت ويريحنا يعني احتمالات لا نهائية اشمعني يعني نقول يتحدوا فينتج عنهم فيروس بمواصفات الاتنين زي ما نكون بنركب الوان مش بنتكلم عن كائن حي!!!!!!!
لا حقيقة علمية وراء هذا الخوف المزعوم فمثلا فيروس الايدز من يومه وهو شديد الحساسية للجفاف ولما ينشف يموت علي طول ومش عارفة ليه ما جالهمش رعب انه يصبح اكثر مقاومة فبالتالي يصيب ناس اكتر ولا هما بيخافوا صفحة وصفحة 

ملحوظة : المشاركة كتبتها في احد المنتديات بتاريخ 12-6-2009

بالفيديو :طرد طالب من حفل تسليم جوائز مسابقة شعر بالأسكندرية بعد هجومه على السيسى

بالفيديو :طرد طالب من حفل تسليم جوائز مسابقة شعر بالأسكندرية بعد هجومه على السيسى
جيل مروان لو خوفناه وخسرناه يبقي ضيعنا مستقبل البلد لأجيال قادمة 
جيل عبناصر مصمم يخلق نفس النموذج اللي خضعله هو ويثبت ان مفيش حد أحسن من حد 
دي الكارثة والمرة دي مش هتبقي ستين سنة لا أكتر كتييير

ليس بالقمع وحده يحيا الناس

يتظاهر أي رافض لقانون أو اجراءات ...تقمعه الحكومة

ضرب ممكن ، سجن جايز ، رصاصة مافيش مانع.

من أعلن موقفه من الدستور بلا في ورقة يوزعها قبضوا عليه ..مع انه موقف رسمي لحزب رسمي ..طب يعمل ايه الحزب؟؟ يعلن ان موقفه لا ويعمل دعاية لنعم؟؟

 مشكلة في مكان يبقي يترفد المسئول عن المشكلة إن أمكن مش ممكن يبقي يتعاقب،  هو كده ..لا بنعرف سبب ولا عايزين نعالج ولا نمنع تكرارها عاقب الأول وبعدين اتكلم

 عندنا مشكلة مياه مع اثيوبيا يبقي برضه اثيوبيا لازم تتعاقب خصوصا لو جينا علي نفسنا وحاولنا نتكلم معاهم ولم يتقبلوا

عصا المعز بتفرقع وذهبه شغال لضمان فرقعة عصي من يقربهم المعز

بيشغلوا خولي انفار مش مدير مفروض يفضل يهدد ويتوعد ويعاقب وخلاص ده علي اصغر مستوي يعني

ايدي لو وجعتني اقطعها وبكده اضمن انها مش هتوجعني تاني بصرف النظر عن إني برضه بقيت بإيد واحدة !!!

في الدنيا طرق أخري لحل المشاكل أكثر عمقا وأكثر فائدة أيضا

دراسة أسباب وظروف أية مشكلة هي التي تحلها بشكل جذري

منع الأخطاء التي أدت لحدوثها هي التي تمنع المشاكل

ومؤقتا اللي زعلان شوف اسبابه لو تقدر تعالجها عالجها متقدرش فهمه ..مش اسجنه ولا اقتله ولا اقمعه 

منع الكلام لن يعلمنا كيف نختلف بتحضر

ولسنا عساكر نظاميين عشان نسمع الكلام واحنا ساكتين 

عزيزي الضابط ..ليس بالقمع وحده يحيا الناس .

أمن الدولة يا أمن الدولة

مالك ومال أمن الدولة ؟؟ سؤال سألته لنفسي كثيرا 

مواطن مثالي زيي عمره ما دخل قسم بوليس كمتهم ولا  حتي بيبلغ عن جريمة

وكل تعامله مع الداخلية فيش وتشبيه ورخصة وبطاقة وما يشبه ذلك 

ماله ومال أمن الدولة طااه

مشكلتي هي البحث عن أسباب تدهور الحال في مصر المحروسة

وأحد أهم أسبابها هو أمن الدولة 

بالبلدي خربوها وقعدوا علي تلها

ليه؟؟؟ 

نبدأ القصة من أولها ما هي مهمة أمن الدولة : جمع معلومات عن أنشطة ممنوعة تضر بالوطن مثلا :مافيا مخدرات ، سلاح ، تجسس ، إرهاب  دعاوي تهدد السلم المجتمعي زي الطائفية مثلا كده يعني

طب هو فعلا بيعمل ايه؟؟؟ بيعتبر النشاطات السياسية تهديد لأمن الدولة ، بيجمع معلومات عن فساد مسئولين بمختلف أشكاله ليس ليعاقب مرتكبه بل "لإخضاعه"

يعني الشباب الوطني اللي بيجتمع في قهوة عشان يناقش شيئا ما دي جريمة

المسئول الحرامي يسرق عادي مفيش مشكلة إنما المهم إنه ينفذ الأوامر وعلي قمتها "الإمداد بالمعلومات والتعاون الأمني"

يعني بيحكموا من خلال ناس فاسدين ماسكين عليهم زلل

وبيتحكموا في أقلام وأصوات إعلامية برضه بنفس الإسلوب

ده غير إنهم أصلا فوق الدولة لا تحكمهم قوانينها ولا يخضعوا لرقابتها

أي أن أمن الدولة أصبح تأمينا رسميا لخراب الدولة 

سلاح بلا حدود في يد أي مستبد يوجهه حيث يشاء 

تقاريره تحكم وتأمر وتنهي وتقضي علي أية أدلة أيضا 

الدولة الأمنية مكروهة لأنها تلوث الشريف ما دام يهددها وتدافع عن كلابها بشكل جيد

كلب السلطة الذليل المشوه أصلا يفعل أي شيء من أجل أن يحتفظ بغنائمه

دولة يحكمها هؤلاء إلي أية مدي يمكن أن تسميها دولة؟؟؟

بس أمن الدولة حلو .مفيش كلام :)