ليه الاطباء بيضربوا؟ عايزين ايه؟ أصلا الشغل في معظم المستشفيات بيسمح بالتزويغ وتقليب العيش والبطالة المقنعة عايزين ايه اكتر من يروحوا الشغل ساعتين واحيانا اقل وبعدين عالعيادات او المستشفيات الخاصة بيضربوا عشان فلوسهم قليلة ليه؟ ما هم ممكن يوقعوا وبعدين يجروا من المستشفي ويجيبوا فلوس عادي زعلانين ليه؟؟ مالهم هما ومال الخدمة الطبية اللي بتتدهور كل سنة اكتر زعلانين عشان لا لاقيين حاجة يشتغلوا بيها ولا عارفين يدوا للمريض حقه هما مالهم طب نفكر بالمشقلب هو ليه الخدمة الطبية متدهورة؟ الخدمة الطبية قائمة علي أجهزة ومواد ومقدم للخدمة الاجهزة الحمد لله لا صيانة ولا تحديث الا بطلوع الروح وبيختاروا الادارة من كارهي تجهيز المستشفيات تقريبا :) المواد لازم تكون الارخص عشان مصر غلبانة ممكن تصرف علي مواكب وتشريفات انما صعب صعب انها تصرف عالمستشفيات ولما بتصرف بتصرف علي ايه الآلاف والملايين بتيجي للحيطان والسيراميك والرخام تقولهم اجهزة يقولك لا منشآت بس!!
طب والدكاترة الدكتور بيتذل بواسطة موظفين روتينيين وحاقدين بمزاجهم او غصب عنهم لشعور مقيم بالدونية يقوموا يدوهم رقبة الدكتور يتسلوا بيها من اول موظفي الامضاء-شئون العاملين- اي اداري في المكان لزوم قرف البهوات والهوانم اللي بيحسبوا نفسهم دكاترة لو حصل ان المذكور كان عنده فرصة يتعلم ما بيلاقيش فرصة-عادة- يطبق اللي اتعلمه ولو حاول يقاوم إحساس الظلم لأن زمايله مزوغين او مستهبلين بيشتغلوا يدوب اداء واجب او حتي تقضية وقت بدل السرحان عالقهاوي وقال لنفسه هاشتغل لوجه الله أشكال الاحباط كتيرة قوي واحد من زمايلنا الكبار جيل عبد الناصر المولود محبط او كائنات وهمية - الا ما رحم ربي- كان بيقولنا مقولة خالدة اللي يشتغل كتير يغلط كتير ويتحاسب علي غلطاته ده واقعي الي حد كبير لما تشتغل في ظروف معظمها غير مواتي هيحصل ايه يعني هتبدع؟؟؟
طب هنستفيد ايه لما الدكاترة ياخدوا حقهم او قريب من حقهم؟ هتديله حقه هيبقي من حقك تحاسبه وكمان هيبقالك عين تحاسبه انما قبل كده سوري تبقي بتستعبط هتديله حقه هتوفر عليه شوية مجهود زيادة ممكن يستخدمهم في المستشفي او حتي في التفكير في حالة المريض او الخدمة المقدمة وازاي نحسنها تحسين الخدمة الطبية محتاج ثورة والثورة بيقوم بيها ناس يا رب يكون عندنا الفرصة نكون الناس دول.
