زجاجة الزيت

إشتريتها عشان لون الزيت عجبني ..زيت زيتون تاريخ إنتاجه قريب شكله حلو ومصري وبنشجع المصري كل ده كويس ومبشر بالخير
تاني يوم أفطر إيه ؟؟جبن قريش بالاعشاب وزيت الزيتون وبدأت محاولات فتح زجاجة الزيت...الله ..فتحها معضلة 
أحاول ..اتقطعت الورقة بالمقص بدل ما تتفتح بسلاسة بالورقة المعدة لذلك
جينا للمشكلة الأكبر الغطاء ده أعمل فيه إيه؟؟ مفروض إنه يتلف فتتكسر النقاط المضعفة مسبقا 
واضح إنهم لم يضعفوها كفاية النتيجة النهائية ما بيتفتحش 
طب بسكينة؟؟ اوكي برضه ما بيتفتحش
المقص الرفيع ده ونمر بكل حرفنة علي النقاط -اللي كان مفروض تبقي مضعفة- ونضعفها أكتر وأي ي ي ي المقص دخل ف صوباعي
المهم أخيرا فتحتها ...زيت ممتاز بجد مش تريقة فيه كل مقومات الجودة إلا ...غطاء الزجاجة لست خبيرة بخطوات التصنيع المؤكد إنه ينقصه شيء مهم وهو إضعاف الغطاء في التقفيل مش عارفين تعملوها ؟؟ إسألوا الإخوة اليونانيين والأسبان بيعملوها ازاي ده حتي فتح الزجاجات القادمة من سوريا أسهل وربنا
ليه يا مواطن منك له ما تعملش فينيش حلو ليه ما بنعرفش نبدع للآخر وحتي آخر خطوة ليه تضيع شغلك الحلو بشكل نص نص 
أو إنهاء أي كلام ..نفسنا قصير؟؟؟ مش فارقة معاك ؟؟ حط نفسك مكاني يا أخي اتعور ليه أنا وانا بافتح قزازة زيت ؟؟ طب اتعورت مرة هاشتريه تاني ولا هادور علي نوع تاني؟؟؟
ما ترحمونا يرحمكم الله