إضراب الاطباء كمان وكمان

إضرابنا لأجلكم ...مش مصدقين اوكي نحسبها مع بعض... طبيب متبهدل يساوي انسان مخنوق لا هيقدر يديلك رعاية ولا حتي يبتسم في وشك مفيش موارد برضه مش صحيح فيه إهدار لموارد وزارة الصحة ومستشارين فلوسهم بالهبل الله يخليكم مش عايزة اسمع كلمة وهنعمل ايه والناس دول اتعودوا علي كده مش عدل يعني إنهم يتعودوا علي التصييف ف الكوت دازيير من مرتبات ومكافآت تعطيها لهم حكومة مصر (الغلبانة) ولا هما  مش م البلد دي معانا برضه؟؟؟ 
المنظومة الصحية قائمة علي : طبيب لا هو متعلم كويس ولا فيه اي متابعة لمستواه ولا برامج تعليم مستمر معتمدة ولا أي حاجة خالص 
تمريض برضه متواضع المستوي وما ينطبق علي الطبيب ينطبق علي التمريض 
أدوية معظمها غير موجود ف المجاني 
مستشفيات يسودها الاهمال وسد الخانة ومبدأ كله تمام المهم محدش يمسك علينا غلطة 
عايز مين يعمل ايه ويؤدي واجبه بما يرضي الله ازاي وهو يعلم ان دخله من وزارة الصحة لن يكفي الكفاف لأولاده؟؟؟
الطبيب بيروح المستشفي في منتصف اليوم ساعات واحيانا آه م الاول بس عادة مش للآخر 
بيبدأ تزويغ حسب ما يجيله شغل لأنه مش قادر يصنف المستشفي علي إنها الشغل الاساسي وبيسمي اللي بره (اكل عيشه) ومعاه حق طبعا هو مرتبه الحكومي هيأكله عيش؟؟؟
مطلوب من الطبيب متابعة الحديث  اذا كان عايز يحتفظ بمستواه حتي مش يحسنه يعني علي الاقل يكون عنده دي اس ال ووقت يقرا فيه 
وشوية تركيز عشان يستوعب اللي بيقراه ...ازاي وهو بيشتغل 15 ساعة واحيانا اكتر؟؟
الاطباء في كل الدنيا علي رأس الدخول ليه؟؟؟ لأنهم ناس يعنيهم صحة شعوبهم أما اللي عايز يخربها فأساس ف هذا الخراب تخريب الصحة 
وزارة الصحة الآن تعتمد علي:  إما متواضع المستوي المهني فمالوش غير المستشفي أو مرتاح ماديا وبيعتبر الشغل ده لوجه الله (متطوع) أو حد زهق من الشغل فهو فعليا (متقاعد) 
هل هناك رعاية صحية حقيقية تقوم علي هذه المقومات ؟؟؟ 
مبدأ يا عزيزي كلنا لصوص يتم تطبيقه في وزارة الصحة بطريقة مختلفة ...أصل الدكتور مش هيفتح الدرج وياخد اللي فيه القسمة عشان يبقي فاسد وملوش عين يتكلم مع رئيسه الحرامي
الدكتور بيفتح عيادة وهنا تبدأ الدائرة يتحول المرضي م المستشفي علي العيادة بمزاجهم أو ضد مزاجهم وتفكير الدكتور بيكون ف كيفية وتوقيت التزويغ لزوم الشغل الخارجي
ولو مفتحش عيادة بيروح مركز طبي ونفس القصة متكررة هناك
المستشفي ومدير المستشفي بيتغاضوا عن عدم التزام الاطباء لأنهم واثقين انه مينفعش يلتزموا ويعيشوا ف الوقت نفسه ودي بأه دايرة الفساد طبيب بيسرق وقت ومجهود هيدافع عنه مدير بيسرق فلوس واعتمادات وهلم جرا 
إصلاح المنظومة صعب ومعقد وهياخد سنين طبعا لكن لابد أن نبدأ ...عرفتوا بأه لماذا يضرب الأطباء؟؟؟

سيدي الرئيس لست الثورة المصرية

الرئيس مرسي نزل ميدان التحرير دافعا الحرس بعيدا عنه بعد نجاحه ف الانتخابات بأيام  ساعتها كنت من الذين دعوا بإخلاص (ربنا يستر) وشعرت انه يرسل للعالم كله برسالة لن أضع الحواجز بيني وبين الشعب بحجة الأمن بعدها باسابيع قليلة حدث ما حدث في رفح وكانت جنازة الشهداء التي لم يحضرها الرئيس مرسي لأن الأمن (نصح) ثم إقالة رئيس الحرس الجمهوري ومدير أمن القاهرة لإنكشاف اللعبة ...قلت تمام كده الحواجز هتتشال تاني ...أبدا من يومها وبدأت الاجراءات الامنية الفظيعة لتأمين صلاة الجمعة ولم أر موكب الرئيس لأعلم الي اية مدي أصبح الشبه بينه وبين موكب المخلوع
وماذا يحدث الآن ...كثير من دعوات اعيدوا حالة الطواريء فإنها السبيل الوحيد للسيطرة علي الوضع الحالي السؤال الذي أتعبني البحث عن جوابه هل القانون العادي عاجز؟؟؟ وإن كان عاجزا لم لا يعدل القانون والاجراءات لتصبح قادرة علي حماية الوطن هل يعيش الناس الطواريء حالة مستمرة ؟؟ دي حتي اسمها طواريء :)
سيدي الرئيس لم أنتخبك لنعود للطواريء ولسيطرة أباطرة (الأمن) علي مقدرات الوطن
لست الثورة لتنتهي ثورة مصر اذا لا قدر الله الا الخير أصابك مكروه لا نتمناه ...الثورة موجودة طالما وجد هذا الشعب الذي ثار بقي أن نؤكد إن نجاح الثورة ليس استبدال حسني بمرسي مع استمرار كل ما عدا ذلك 
والا هاتوا مبارك بأه :))