زعلان من البلد مش عاجبني اختيارات الناس اتلعب بيا وبيهم وبدل ما افهم الموضوع مشي ازاي هنمشيها لعب عيال تيجوا نهاجر؟؟؟ آه طبعا نهاجر هنقعد في البلد دي ليه عشان ايه أحلامنا بتتسرق وعمرنا بيضيع وظلم بيجر ظلم وعمر البلد دي ما هيتصلح لها حال صح؟؟؟ طب تمام البلد اللي بتحملوها كل حاجة دي مجموعة بشر بيحكمهم نظام مش هاقولكم العيب فيكم لإن النظام مفروض علينا كلنا واللي فرضه أصحاب مصالح ما بتخلصش هنهاجر ونسيبهالهم ولا نواجه ونقعد لهم علي قلبهم؟؟؟ اعملوا اللي عليكم بلاش نظام الانكار والاستحمار وما غلطناش لسبب بسيط مفيش حد ما بيغلطش أيام انتخابات مجلس الشعب سمعت من ناس كتير كلمة عايزين ننتخب الشباب دوروا مين مرشح نفسه ملقيوش للأسف معظم اللي اترشح لاعبي السياسة ولحد الآن معظم الثوريين مش عايزين يلعبوا سياسة يا جماعة لما يكون عندك فكرة -حلم لوطن أحسن انك تفضل تطالب بيه في الشارع ولا تحاول تحقق الحلم بإيدك؟ وانت في الشارع علي فكرة بتطلبه من غيرك يا سمع واقتنع يا ما سمعش يا اقتنع جزئيا في الاول وفي الآخر انت تحت رحمته طب ليه؟؟
هنسيب الشارع كوسيلة ضغط ونجري عالكراسي مين قال كده؟؟؟ الدنيا ادوات افحص ادواتك واستعمل كل واحدة حسب الحاجة برجماتية؟؟؟ ماشي مش عايز تشارك بنفسك ادعم حد عارف انه هيحقق للثورة مطالبها لأنه مؤمن بيها بلاش سلبية هاقاطع الانتخابات الزفت اللي جاي ده هيحكمنا كلنا والنيعمة مش هيقول اللي مقاطع مش هاحكمه ويا سيدي انتخاباتنا بارك الله فيها مالهاش حد أدني يعني لو تلاتة راحوا الانتخابات هيجيبولنا الرئيس بأغلبية اتنين الي واحد آه والله معرفناش نحشد الناس لفكرة لا دستور ولا انتخابات تحت حكم العسكر يبقي ننتخب ونراقب ونمنع التزوير بايدينا
عندكم حل تاني ولا هنرجع تاني نقول نهاجر؟؟؟
