اقتصاد الجيش

يواجهوننا بحقائق غريبة مملكة الجيش الاقتصادية بقوام عدة مليارات بلا رقابة من الدولة بلا انخراط في الاقتصاد المدني بلا إشراف من اي مؤسسة من مؤسسات الدولة بلا ..بلا ... حجتهم غريبة يقولون لنا ان السبب هوتمكين الجيش من التغلب علي اي ضغوط اقتصادية خارجية أو (داخلية) لا والله هو كل مؤسسة ف البلد مفروض تصرف علي نفسها وتعمل اقتصادها المنفصل وما يبقاش لحد عندها حاجة طبعا اومااال

ولو فعلتها كل مؤسسة في الدولة كيف يصلح تسميتها دولة؟ وبما إن الجيش يفعلها فلم لا نفعلها جميعا ويلا خليها هيصة ومحدش ليه حاجة عندنا وشركاتنا اللي تعبنا فيها واللي يقرب منها هنجيب كرشه!!

الحرب الوحيدة اللي ربنا كرمنا فيها ونصفنا كانت حرب 1973 وأيامها مكنش الجيش مشغول بالبيض والعربيات والمكرونة ولا كان (مستقل) اقتصاديا كان كل المصريين متحملين تقشف عشان الجيش يشتري سلاح ويتدرب ومحدش (ضغط) وقال لزمته ايه الصرف عليهم

الاستقلال الاقتصادي نكتة بايخة وحجة فارغة للتكويش والتقليب والافلات من اي رقابة للدولة علي احدي مؤسساتها -المؤسسة العسكرية

اذا كان الجيش شايف نفسه فوق الدولة أو منفصل عنها وتأكيدا لهذا الانفصال له امبراطورية اقتصادية لا يقبل المساس بها علي اساس انهم ورثوها من الوالد فلن تقوم للدولة قائمة حتي يعود مال الشعب للشعب يا جيش مش لمن استولي عليه بحجة الاستقلال الاقتصادي

الإخوان كتبوا بيان!!

يا سادة كان يا ما كان يا سعد يا إكرام فيه جمع م الانسان اسمهم الإخوان

عمري ما فهمتهم ساعات كنت باشوفهم كائنات هلامية تحب أن تعيش في جو يكتنفه الغموض

ساعات تانية كنت باشوفهم ناس بتحاول انما بطريقة غريبة شوية ناس معندهاش مشكلة ف الغاية تبرر الوسيلة مع تأكيدهم المستمر علي تمسكهم الفظيع بالدين

الخلاصة اتفقنا أو اختلفنا احتمال ان السبب الرئيسي لرفضي لهم هو نفس السبب اللي خلاني ما انخرطش في اي مجموعة أصلا حبي المفرط لحرية القرار ورغبتي في الاقتناع بأي شيء قبل أن اكون جزء منه

الاخوان لهم دور في الثورة ما نزلوش كجماعة م الاول بدأوا النزول يوم 28 بأعداد الاول كان فيه بعض الشباب بس حتي ما كانوش بيجيبوا سيرة مكنش حد عايز يعلن انتماء ولما اعلنوا انهم نازلين وبأعدادهم الغفيرة كان ده بداية من يوم 28 يناير 2011 مجموعة منظمة قادرة علي الحشد ونازلة بكامل الثقل وضغطوا مع الناس ومن يومها والعسكر بيعملولهم ألف حساب

قبل الانتخابات كانت احداث محمد محمود والاخوان قعدوا ف البيت عادي

دخلوا البرلمان وبدأنا نسمع درر اول جلسة بس كنت فخورة وحسيت انه برلمان الثورة بجد بعدها يا لخيبة الامل برلمان الثورة قال ان الثوار بياخدوا 200 جنيه وشريط ترامادول!!!

طالبنا بإقالة الحكومة قالولنا ليه كده ماله يعني الجنزوري؟؟؟ ادوله فرصة واتفض اعتصام مجلس الوزرا واستمر جنزر

واستمر الاخوان في تمثيلية هزلية اسمها الجلسات البرلمانية صحيح مسلية انما عادة تحرق الدم شويتين لقينا العسكر بيقولولهم هنشردكم لو ما كنتوش ......ايه بقي احنا مش فاهمين؟؟ الموضوع تغيير حكومة صحيح ولا فيه حاجة تانية؟؟؟ برضه مش ده مربط الفرس الإخوان طلعوا ببيان بيلوحوا فيه بإن الشعب قادر علي استكمال ثورته!!! نعم يا حبيبي هو انا اللي قلت المظاهرات مرحلة وعدت والشرعية في البرلمان الي آخره شعب مين هنجيبه منين الشعب ده بعد ما فهمتوا الناس انه قد حان وقت العمل والعجلة العجلة العجلة- عجلة الانتاج يعني- اللي خلاص الناس ما تعلمه عنها الآن انها هتتعطل للابد لو شافت خيال حد ف الشارع مظاهرة ولا اعتصام هتقولولهم ايه؟؟ اللي لما قلناه قولتولنا لا يصح ولا يجوز وايقاع بين الشعب وقواته المسلحة؟؟؟

ربنا يهدينا ويهديكم ويا رب أفهم قبل ما اموت هو انتو عايزين إيه أصلا؟؟؟

 

يطلقها أما هي فتخلعه

الزواج علاقة خاصة جدا واذا فقد أحد الطرفين رغبته في الاستمرار واستحالت العشرة فماذا يفعل؟ اذا كان رجلا فلا مشكلة سيطلق زوجته يطلق سراحها ويطلق سراح نفسه من علاقة أصبحت تؤلمه أو علي الاقل غير مريحة بالنسبة له وهل تملك امرأة حق الاعتراض علي الطلاق؟؟ زوجها ينطق الكلمة ويترك شيكا او مبلغا من المال نفقة - مؤخر ويسير قدما وليس ثمة من يملك ايقافه أقصي ما يستطيع كائنا من كان نصيحة ...مجرد نصيحة

أما المرأة فلا تملك حق الطلاق لا تملك إلا أن تطلب ..تطلب الطلاق فيعترض الزوج ويعترض الأهل ويعترض الجيران!!!

طلب المرأة الطلاق يعتبره الرجل إهانة لرجولته فحتي إذا كان لا يريدها كيف تجرؤ هي أن تعلن عدم الرغبة في الحياة معه؟؟ ينسي أو يتناسي إنها إنسان كامل الأهلية وإن الحياة لا تستمر بضغط (هل فقدتي عقلك؟) الخلع حق للمرأة أقره الرسول عليه الصلاة والسلام بمجرد قرارها عدم الرغبة في الاستمرار عليها أن ترد كل ما أعطاه لها أن تخلعه من حياتها بلا حتي ذكري تحملها هدية 

الرجل الحقيقي لا يرغم إمرأة علي الحياة معه ولا حتي علي رد ما منحه اذا ارادت الطلاق ولمثل هؤلاء لا تحتاج امرأة لقانون خلع أما من يتلذذ بتركها معلقة ويحب عذابها فلابد له من قوة ترغمه علي عدل لا يعرفه ولم تعلمه له رحلة الحياة!

أفتقدك يا أمي

من هي؟؟ الوحيدة التي لم أكن أحتاج لكلمات حتي تفهمني القلب الذي كان دائما يسعني حتي والمرض يضعفه والموت يطارد دقاته الأمان بلا حدود ولا طموح لمزيد

 العقل الواعي الناصح الأمين الذي طالما جئته بهمومي فنفضها عني  وعلمني كيف احل مشاكلي أو اتناساها

أمي

رحلت وكانت آخر كلماتها دعوات لي في يوم يعد أصعب أيام حياتي دعت الله ورحلت وكانت تخشي عليَ بعد رحيلها وكان معها كل الحق

بعد رحيلها افتقدت الكثير وعانيت ولا زلت أعاني أعوام مضت ولا زالت دموعي تغلبني حين أتوق الي أمي حين تثقل رأسي الهموم وأحتاج صدر أمي

 أفتقدك أفتقدك يا أمي
 اللهم ارحمها

أمي التي تظلمني .....مصر

واحدة اتجوزت راجل طيب وابن حلال وكريم وأخلاق وكان لها منه أبناء وبنات رائعين ربنا اختاره والاولاد استمروا في طاعة الأم وبرها بكل طريق دافعوا عنها بأرواحهم وعملوا كل حاجة ترضيها الأم شابة وجميلة واتجوزت تاني راجل بيعرف يتكلم ويضحك عليها ودي ميزته الوحيدة يفهمها انها أهم حاجة في الدنيا ويخون ويسرق مال الأيتام والأم مصدقاه ومقتنعة بكل كلمة بيقولها خلف منها أبناء نصابين زيه كل اللي يهمهم يكسبوا من كل موقف بيكذبوا ويغشوا ويخدعوا ويعملوا كل المصايب ويرجعوا يفهموا الأم انهم مخلصين لها ولاخوتهم وان كل حاجة بيعملوها (للصالح العام) كل ما الابناء الطيبين يعملوا خير يفسروه للأم شر وتصدقهم كل ما الأب يسرق ويظلم يدافعوا عنه أبناء السوء بالظفر والناب والأم تصدق وتدي أكتر للخاين وأولاده الكلمتين بتصدقهم ويتقلب الحق باطل وتفضل كفة الميزان دايما في صالح الظالم ضد المظلوم 

إلي متي يا أمي؟؟؟

نون النسوة

8 مارس يوم المرأة العالمي ليه؟ السبب قد يكون انعقاد أول مؤتمر للاتحاد النسائي الديموقراطي العالمي في باريس عام 1945 وقد يكون بسبب اضرابات نسائية في الولايات المتحدة

هل يعني اختيار يوم للمرأة اننا نتذكر النساء في يوم لننساهن بقية العام؟؟ واذا كانت المرأة منسية 364 مش فارقة يوم يعني كملوها :(

المرأة التي تعامل بدون مناسبة علي أساس من انتقاص الأهلية أعلم انها في الشهادة نحتاج أثنتين (لتذكر احداهما الأخري) ولكن هذا لا يعني أنها نصف مواطن ولا نصف إنسان يعني فقط انها تحتاج لتذكرة أحيانا والله أعلم 

والتاريخ مملوء بنساء لهن بطولات وآراء سديدة وانجازات متعددة والمرأة اولا وأخيرا انسان لا يصح أن تعامل علي اساس عنصري طول الوقت لمجرد انها (إمرأة) ليس عيبا خلقيا بل هو اختلاف والنساء عادة أشد حماسة وتمسكا بالمواقف (عاطفيات أوكي المهم النتيجة) ولم أكتب هذه التدوينة دفاعا عن المرأة لأنني أشفق علي أية رجل يقف في وش واحدة ست (غلبان صحيح يعني) ولا لتذكير اي حد باليوم العالمي للمرأة الذي لاأظن ان هناك من نساه فقط للتأكيد علي ان المرأة نصف المجتمع ومعظم رقته وجل ضميره وانها تستحق أكثر كثيرا من يوم نسميه يوم المرأة لتتوه بعدها طوال السنة في ذاكرة مجتمع يحب أن يتناسي.

أفلام حكومية

صحينا لقيناهم شنوا هجمة عنترية علي الجمعيات الحقوقية وتعالوا هنا فين الفلوس يا بتوع التمويل الاجنبي وإيه ده كمان؟؟ يا سنة سوخة يا ولاد خرايط لتقسيم مصر.. مصر امي اللي هي في نفس الوقت مرات ابويا وع الوشين شغالة شوية دلع وشوية سك عالنافوخ المهم شممكن نسمح إن مصر تتقسم تتقسم ولما اقرر أزور الهرم آخد تأشيرة لدخول القاهرة لا مينفعش  خصوصا لو رفضوا يدوهالي يا دي الحوسة وطوابير بقه ورفض غير مسبب وعيشة وهما هيقسموها ليه؟؟ شغالين في حرس الحدود واستغنوا عنهم فقرروا يعملوا كام دولة صغننة يسلوا نفسهم بيهم الحقوقيين اللي كانوا من كام يوم بيراقبوا الانتخابات واللي طول عمرهم بيدافعوا عن حرية التعبير والديموقراطية والمعتقلين السياسيين و... فجأة كده قلبوا شرير الرواية وطلعنالهم كل البلاوي اللي موجودة أو...بنلزقها فيهم أخدت الحكومة حبوب الشجاعة وقفشت كمان 20 (غير-مصري) أهلا لأ بأه دي أكيد الاتهامات جادة وإلا مش هيقدروا يوجهوها لناس سفاراتهم ما بتسكتش وحكوماتهم جامدة وشعوبهم لها صوت عند الحكومة اكيد الاتهامات جادة وجامدة يكونوش جواسيس؟؟؟ آه اكيد وهنبادلهم بأه بناس مصريين ونضغط بيهم وأعطني سجيني اسلمك لاب توبك شوية ولقيناهم بيقولوا المصريين بس اللي راحوا المحكمة طب والتانيين كان وراهم تنفيض تقريبا فنفضوا للمحكمة مفيش مشكلة أكيد هيحضروا الجلسة اللي بعدها ولا سفاراتهم هتتفاوض ونعمل شغل بأه وكده المفاجأة التانية بقه إنهم قالولنا القاضي اعتذر وبعدين الف مبروك مفيش منع من السفر افرح يا شعب لن نركع بس هنظبط ونشوف الارض دي ننضفها ازاي م الحوسة وبرضه من غير ركوع الزحف مفيهوش مشكلة بس ركوع لا خالص 15 سافروا وواحد رفض السفر و4 سقطوا سهوا ما دول بأه سافروا (قبل) قرار القاضي ما علينا ومش كل كلمة هنقف عندها هنفوتها عادي هيه جت علي 4 ؟؟؟ لما محكمة تاخد قرار بالامر المباشر يبقي فاضل ايه ؟؟ ولما انتو مش قد العند مع امريكا بتعاندوها ليه؟؟؟ أمريكا كمان انتخاباتها قربت بدل ما تجيب لهم تذاكر علي اي طيارة عادية هوب طيارة عسكرية والبس يا شعب واللي يشل يقولولنا الطيارة نزلت بدون إذن اصله موقف محطة مصر والسايس كان بيتغدي قوم الطيارة نزلت ولما جه دفعها جنيه زيادة وكمان وصي الامين صاحبه يكلبش العجل وقسم معاه المخالفة زبون قليل الادب لازم يستأذن!!!
الحكومة المصرية -بيقولوا- إنها ناوية تهبد الامريكان -اللي عمرنا ما هنشوف خيالهم- حكم فظيع هينسحب بالطبيعة عالليلة كلها ونلبس اذن المصريين مذنبين بالتبعية وهيراقبوا الانتخابات ازاي العملا دول ؟؟ الهدف إذن هو الانتخابات الرئاسية مش بس في مصر لا ف امريكا كمان شوفتوا الحكاية حلوة ازاي ؟؟