الأمل الأخير

كل يوم اخبار الانفلات الامني وتتوالي مقولات: البلد محتاجة الامن -الداخلية مانزلتش أصل فيه تمرد- البلطجية ماليين الشوارع
كلنا بنمشي في الشوارع مين شاف الانفلات الامني ؟ كنت باحاول افهم مين بيقول الكلام ده وبيقوله ليه؟ لقيت انه كلام الداخلية نفسها السبب؟ ببساطة كده مبيعرفوش يتعاملوا مع مواطنين ما اتعلموش غير معاملة العبيد ومحتاجين شيك علي بياض انهم يعملوا ما بدا لهم بدعوي السيطرة علي الامن والانفلات الامني احتمال يكون فيه انفلات أمني بجد طيب فيه بشري لاهالي المحروسة انتشرت من يومين ان جميع الدول قد رفعت حظر السياحة عن مصر ومهما قلنا ان اوروبا متعاطفة مع مصر بعد الثورة وعايزين يساعدونا المواطن بتاعهم غالي قوي ومش هيساعدونا بالتضحية بمواطنيهم.
احتمال تاني اسخف من الاولاني ان الانفلات الامني المزعوم هو الأمل الأخير لمن تعودوا ان يسيطروا علينا بالخوف خوف الجوع- خوف القتل- خوف الاعتقال- وآخر ما تمخضت عنه العبقرية خوف الانفلات الأمني.

الي مجلسنا الموقرمع حبي وتقديري

مجلسنا العسكري الغالي: لا يتصور أحد اننا قمنا بثورة لكي نستبدل حكم شمولي ديكتاتوري بآخر برضه شمولي وديكتاتوري
للأسف وشديد الخجل يا مجلس العسكر يبدو أنكم لا تستوعبون هذه الحقيقة البسيطة نريد حكما مدنيا ديموقراطيا تتحقق فيه عدالة حقيقية بين أفراد الشعب لا نريد استبدال الدولة البوليسية بأخري عسكرية ولن يستطيع أحد ان يتحايل علينا لكي نبتلع الطعم ونكتشف اننا كأنك يا ابو زيد لا رحت ولا جيت كل شيء في مصر المحروسة يتسمي باسم جديد هذا لا يعني ان مصر تتغير كل شيء في بلدنا تماما كما هو وانتم تحمون بقاء الفساد الذي زرعه مبارك بل وتحمون مبارك ذاته
مجلسنا الموقر لن نستطيع تحمل فكرة بقاء أمن الدولة بمسمي الامن الوطني ولن نتحمل وزراء الفساد بدعوي استقرار الحكومة ولن نتحمل مماطلة الحساب  لهؤلاء الخاضعين للتحقيقات ولن نتقبل ببساطة هروب واحد مثل ابن صفوت الشريف الذي أخلي سبيله لسبب ما وطبعا ما كدبش خبر وهرب
لا نستطيع ان ننكر ان الجيش المصري لم يفتح النار علي المصريين ولكن لتأكيد ان الجيش حمي الثورة ابعدوا عن الثورةمبارك وفلوله والثورة المضادة ارحمونا يرحمكم الله

ديكتاتور؟؟؟

كام واحد فينا ديكتاتور؟

هل كل ما اختلف معاك حد بتتمني لو جتله قذيفة تايهة شالته من قدامك؟

هل بتتحمل ان اي موضوع في الدنيا عادي انه يكون فيه وجهتين نظروجايز اكتر كمان؟

هل تثق في آخر يختلف معك في الرأي؟

لاحظ اني لا أعني اختلاف المأجورين الذين لا يمكن ان تشك في انهم قابضين تمن كل كلمة

اعني من يختلف معك حقيقة

وليس من يكون دوره في الرواية انه المختلف

ولكي تحدد من هو بايع وقابض فلا يكفي علي الاطلاق ان يختلف مظاهر المتاجرة كتير ولا يصح فيها الاخذ بالشبهات

المهم اذا اختلف حد لانه فكره غيرك او حتي مش فاهم بتتحمله ولا بيكون نفسك يخرس؟

جاوب بشجاعة لانك هتعرف اذا كنت مبارك تاني او قد ايه دمرك بابا مبارك باجابة هذا السؤال البسيط

العيب فينا؟؟؟

مقولة شكلها حلو الفساد في كل الشعب والمفروض كل واحد يصلح نفسه

صح جدا صلح نفسك ومتجيبش سيرة فساد الحاكم او نظام الحكم هو حد قالك انهم عايزين يصلحوا نفسهم؟

خليك انت في نفسك

صب اللعنات علي الموظف اللي مش لاقي يأكل اولاده لو أخد رشوة عشرة جنيه

أو خليك رحيم واديله عشرين وقول لنفسك انه غلبان ويستاهل الصدقة 

الاتنين فساد علي فكرة

لما تدي للموظف فلوس وغيرك ما يديش مصلحتك هتمشي وهو لأ وسلملي علي القلوب الرحيمة

نفس هذا الشعب اللي بيزوغ من الشغل ويتهرب من الضرائب ويكسر الاشارات في مصر

هو نفسه المواطن المثالي شديد الالتزام في كل حتة برة مصر تفتكروا ليه؟

ما هو هو المصري (الوحش) اللي مفروض يتكتم وما يجيبش سيرة فساد حد لما يصلح نفسه الاول

لا أزعم اننا شعب من الملائكة ولكنني أصر انه حتي الشياطين تستحق ان يحكمها نظام ليس فاسد ولا مفسد

حتي الشياطين تستحق العدل لانه هو القاعدة وليس الاستثناء